ФЛИШ (нем. fl iessen — оқмоқ) — денгиз чўкинди тоғ жинсларининг қалин қатлами (серияси), қалинлиги 1000 м гача бўлган геологик ётқизиқ. Асосан, чақиқ жинслардан иборат. Денгизнинг муайян чуқур жойларида бир турдаги оҳактош, қумтош, гил, мергель каби чўкинди жинсларнинг ўзаро такрорланишидан ҳосил бўлади. Флиш бир қанча кичик (бир неча см дан бир неча дм гача) цикллар (циклотема, циклосома, қаватлар)дан тузилади. Циклосомалар 2 — 4 қават, ёки элементлардан иборат бўлиб, пастки қисми донадор жинслар (қумтош, алевролит, чақиқ оҳактошлар)дан, юқориси эса, пелитлардан таркиб топган бўлади. Флиш учун шакли ҳам пайдо бўлиши турлича гиероглифлар хосдир. Флишнинг шакллилиги (ритмлилиги) чўкинди ҳосил бўлиш хусусияти — асосан, лойқали оқимнинг такрорланиш даврларига боғлиқ. Флиш типик геосинклиналь формация (геогенерация) бўлиб, эвгеосинклиналь ёки миогеосинклиналь ороген олди ривожланишига хос. Флиш микрофаунага камбағал, баъзан планктон микроорганизмлар чиғаноқлари (фораминифера, радиолярийлар)га бой, юқори қисмида бентос фораминифералари кўп. Энг типик Флиш геосинклиналь ривожланишнинг ўрта босқичида таркиб топади. Флиш билан нефть ва минерал сувлар боғлиқбўлади. Флиш протерозой, палеозой (Урал), мезозой (Карпат) ётқизиқларида кўп учрайди; Ўзбекистонда Жан. Фарғона (Кррачатир), Бўкантов атрофларида бор.