ФИШЕР Эмиль Герман (1852.9.10, Эйскирхен — 1919.15.7) — немис органик кимёгари. Страсбург ун-тини тугатган (1874). Мюнхен (1879 й. дан), Эрлангер (1882 й. дан), Вюрцбург (1885 й. дан), Берлин (1892—1919) ун-тлари проф. Илмий ишлари углеводородлар, оқсиллар, пурин бирикмалари кимёсига оид. Пуриннинг физиологик фаол ҳосилаларидан — кофеин, теобромин, ксантин, гипоксантин, теофиллин, гуанин ва аденинни (1897), сийдик кислота (1899), шунингдек, пуринни (1898) синтез қилган. Қандлар (1887 й. дан), манноза, фруктоза ва глюкоза (1890) синтезини амалга оширган. Кўпгина оқсилларнинг парчаланиш маҳсулотларида валин (1901), пролин ва оксипролин (1902) мавжудлигини очган, полипептидлар синтезига асос солган ва илк бор соф дипептид олган (1902). Нобель мукофоти лауреата (1902).