МАЛИНКЕ, манинка — Ғарбий Африкада тарқалган манде тилларидан бири, бамана ва диула тиллари билан биргаликда мандинго тил бирлигини ташкил этади. Сенегал, Гвинеяда, қисман Мали, Либерия, Сьерра-Леонеда тарқалган; унда 4 млн. га яқин киши сўзлашади. Анчагина лахжалари бор: конья, коранко, манья, мау синья ва б. М. да унлилар тизими ривожланган: очиқ, чўзиқ ва бурун фонемалар; бу уч белги-хусусият бир фонеманинг ўзидан намоён бўла олади. Морфологияси яхши ривожланмаган аналитик тил бўлганлиги сабабли, Малинкеда синтактик воситалар, хусусан, гапда қатьий белгиланган сўз тартиби, кўмакчиларнинг алоҳида ўрни катта аҳамиятга эга.