КИНО ҚЎЙИШ АППАРАТИ, кино проектор (кино ва лот. projectio — олдинга ирғитиш) — кинога олиш аппараты билан киноленталарга олинган кинофильмларни экранга тушириш учун мўлжалланган қурилма. У кинолентанинг сурилишини таъминлайдиган тортиш механизми, лента ўраладиган ва бўшаладиган кассеталар, экранни ёритиш ва тасвирни экранга тушириш учун ёритиш-проекциялаш тизими, овоз эшиттириш қурилмаси, электр энергияси билан таъминлаш ва аппарат ишини бошқариш қурилмаларидан иборат. Кино қўйиш аппаратида кинолента махсус механизм (мальта механизми ёки грейферли механизм) ёрдамида тўхтаб-тўхтаб (ўзлукли) ҳаракатланади. Тўхтаб-тўхтаб айланувчи тишли барабан ки-нолентани битта кадрга суриб туради. Бир кадрдан иккинчисига ўтиш вақтида обтюратор ёруғлик нурлари оқимини тўсади, лента яна бир кадр сурилганда обтюратор ёруғлик нурлари йўлини очади. Шунда экранга тасвир тўшади. Бу жараён шу тариқа давом этаверади ва жуда тез (секундига 24 кадр) юз бергани учун томошабин орадаги ўзилишларни сезмайди. Кино қўйиш аппарати экранга тасвирни тушириш билан бирга фонограммага ёзилган товушни ҳам тасвирга монанд (синхрон) равишда эшиттиради. Кино қўйиш аппаратининг муқим (стационар) ва кўчма турлари бўлади. Муқим аппаратлар киноаппаратхоналарга доимий ўрнатиб қўйилади. Уларнинг ёрдамида кинофильмлар очиқ ёки ёпиқ залларда намойиш қилинади. Кўчма аппаратларни исталган жойга олиб бориб ишлатиш мумкин. Улар билан очиқ майдонларда ҳам, ёпиқ залларда ҳам кинофильмлар қўйилади.
Кино қўйиш аппарати кинолентанинг энига қараб ҳам фарқланади: 16 мм, 35 мм ва 70 мм ли киноленталарга мўлжалланган, универсал ҳамда махсус (доиравий, стерео-скопик ва б. фильмларни намойиш қилиш учун мўлжалланган) аппаратлар бўлади. Бўлардан ташқари, ҳаваскор кинематографлар учун мўлжалланган аппаратларда эни 8 мм ли кинофильмларни қўйиш мумкин. Бундай аппаратларда, асосан, овозсиз фильмлар қўйилади. Овозли фильмларни қўйиш учун магнитофон ва синхронловчи (тасвир билан овознинг бир вақтда кетишини таъминловчи) қурилмадан фойдаланиш керак. Кино қўйиш аппаратининг энг муҳим кўрсаткичи — экраннинг ёрқинлигини ифодалайдиган фойдали ёруғлик оқими. У люмен (лм) да ўлчанади (350—50000 лм). Ёруғлик оқимини чўғланма лампа, ксенон лампа ёки кўмир ёйи ҳосил қилади (яна қ. Кинотехника).