КАТТА ТЎСИҚ РИФИ — Австралиянинг шим.-шарқий соҳили бўйлаб жойлашган қатор маржон рифлари ва маржон ороллар. Материк саёзлигининг чегараси бўйлаб Янги Гвинеянинг жан. қирғоғидан Санди-Кейп бурнигача 2300 км га чўзилган. Рифнинг кенглиги шим. да 2 км, жан. да 150 км. Рифларнинг кўпи сув остида, сув сатқи пасайган вақтларда сув юзига чиқади. Баъзи рифлар оролга айланиб, шакли, одатда, тақага ўхшайди ва қавариқ томони жан.-шаркдан эсувчи пассат шамолларига қараган. Катта Тўсиқ Рифи б-н материк қирғоги орасида Катта лагуна ёки «Ички канал» сув йўли (энг чуқур жойи 50 м) бор. Бу сув йўли океан тўлқинларидан тўсилган; кемачиликда фойдаланилади. Денгиз миллий парки бор.