КАМЧАТКА ВИЛОЯТИ — РФдаги вилоят. 1932 й. 20 окт. да Хабаровск ўлкаси таркибида ташкил этилган. 1956 й. дан Коряклар мухтор округини ўз ичига олган РФнинг мустақил вилояти. Камчатка я. о. да, шунингдек, Карага ва Командор о. ларида жойлашган. Охота ва Беринг денгизлари ва Тинч океанга туташ. Майд. 472,3 минг км2. Аҳолиси 383,2 минг киши (2000), асосан, руслар, шунингдек, украин, коряк, ительмен, эвенк, алеут, чукчалар ҳам яшайди. Шаҳарликлар 81,3%. 11 ту-манга бўлинган, 5 шаҳар, 11 шаҳарча бор. Маркази — ПетропавловскКамчатский ш. (Табиатини Камчатка ва Коряклар мухтор округи мақолаларидан қ.). К. в. РФнинг асосий балиқсаноати р-нларидан бири. Балиқ, асосан, Беринг денгизи ва Тинч океандан овланади. Камчатканинг ғарбий қирғоғига яқин сувлари — краб овланадиган асосий р-н. Йирик балиқ ва балиқ консервалаш з-длари: Петропавловск, Октябрский, Озерновский, Кировск, Усть-Камчатск, Олюторский. Вилоят хўжалигида мўйнали ҳайвонлар овлаш ва даррандачилик муҳим аҳамиятга эга. Ўрмон саноатида ёғочсозлик корхоналари Камчатка дарёси водийси бўйлаб жойлашган. Кемасозлик, кема тузатиш ва қурилиш материаллари саноати корхоналари бор. Кўмир, гидроэнергия, ер ости қайноқ сувлари каби энергетика ресурслари мавжуд. Паужетка иссиқ булоғида қуввати 11 минг кВт бўлган геотермал электр станцияси, Петропавловск-Камчатскийда иссиклик электр маркази қурилган.
Қ. х. да буғучилик-овчилик ва чорвачилик-сабзавотчилик ривожланган. Буғу боқиладиган кенг яйловлар бор. Даррандачилик мавжуд. Чорвачилиги сут етиштиришга ихтисослашган. Паратунка иссиқ булоқлари асосида йирик иссиқхона-парникларда сабзавот етиштирилади. Мўйнали қайвонлар (сувсар, қундуз, тулки, оқ тулки ва б.) овланади. Транспортнинг асосий тури денгиз транспорти. Асосий портлари — Петропавловск-Камчатский ва Усть-Камчатск. Ҳаво ва автомобиль транспорти катта роль ўйнайди. Камчатка дарёсида кема қатнайди.