ЖАҲОН ПОЧТА ИТТИФОҚИ — халқ аро давлатлараро ташкилот; БМТнинг ихтисослашган муассасаси (1947 й. дан). I Халқаро почта конгрессида ташкил этилган (1875). 1878 й. гача Умумий почта иттифоқи деб аталган. Вазифаси почта хизматини яхшилаш, шу соҳада ҳамкорликни тараққий эттириш, ривожланаётган мамлакатларда почта хизматини ташкил этиш ва такомиллаштиришда техника ёрдами кўрсатишдан иборат. 2002 й. 1 янв. даунда 189 давлат аъзо бўлган. Ўзбекистон Республикаси 1994 й. дан аъзо. Асосий органлари: Жаҳон почта конгресси, Ижроия кенгаши, Почта эксплуатацияси кенгаши ва Халқаро бюро. Олий органи — конгресс, 5 йилда 1 марта чақирилади. Жаҳон почта иттифоқининг расмий тили француз тили, иш жараёнидаги тили — инглиз, испан, рус тиллари. «Почта иттифоқи» журнали, конгресслар ҳисоботи ва б. ни нашр қилади. Ўзбекистон вакиллари 21-конгресс (1994 й. Сеул ш.), 22-конгресс (1999 й. Пекин ш.) да қатнашган. Жаҳон почта иттифоқи идораси Берн ш. да жойлашган.