ГАЛЬВАНИК ЭЛЕМЕНТЛАР — электр токи манбаларининг умумий номи; электролит ва унга ботирилган иккита турли хил металл пластинка (электрод)лян иборат. Бундай элементларнинг яратилишига итальян олими, физиолог Л. Гальвани жониворлар устида ўтказган тажрибалар асосий туртки бўлди (номи шундан). Гальваник элементларда кимёвий реакция натижасида ҳосил бўлган энергия бевосита электр энергиясига айланади. А. Вольта яратган вольта устуни биринчи Гальваник элементлар бўлган. 19-а. ўрталаригача Гальваник элементлар ягона электр токи манбаи ҳисобланган. Электродлардан бири (мусбати) анод, иккинчиси (манфийси) катод деб аталади. Реакция натижасида электродларда потенциаллар фарқи ҳосил бўлади. Бу электродларни туташтириб турадиган симда электр токи вужудга келади. Энг кўп тарқалган Гальваник элементларда мусбат электрод ўрнида кўмир таёқча, манфий электрод ўрнида рух таёқча, электрод ўрнида эса новшадил эритмаси ишлатилади. Суюқ электролит ўрнида қуюқ пасталар қўлланилса, «қуруқ» элемент (Лекланше элементи) ҳосил бўлади. Гальваник элементларда реагентлар сарфланиб (зарядсизланиб) бўлганидан сўнг у ишга яроқсиз ҳолга келади, яъни уларни қайта зарядлаб бўлмайди. Гальваник элементлар ихтиро қилиниши билан ток хусусиятларини ўрганиш ва ундан фойдаланиш имкони юзага келди, электротехниканинг фан сифатида шаклланишига асос солинди.